Ózbekstanda halyq sanaǵyn ótkizý úshin 63 mln dollardan astam qarajat qajet
TAShKENT. KAZINFORM – Aldyn ala esepke saı, Ózbekstanda halyq sanaǵyn ótkizý úshin 800 mlrd sým ($63,4 mln) qajet. Bul týraly jýrnalısterdiń qatysýymen ótken baspasóz maslıhaty barysynda Statıstıka agenttiginiń sanaq protsesterin uıymdastyrý jáne ótkizý basqarmasynyń bastyǵy Kobıl Berdıkýlov málim etti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Halyq sanaǵyn uıymdastyrýdyń kúrdeli protsess ekenin jáne oǵan baǵyttalatyn shyǵyndardy eskere otyryp, ony ótkizý 2025-2026 jyldarǵa josparlanǵan.
«Halyq sanaǵyn ótkizýge daıyndyq 2019 jyly bastaldy. 2021 jyly biz 4 óńirde pılottyq negizde halyq sanaǵyn júrgizdik, ol joly úsh ádisti qoldanyp kórdik. Qazir biz respýblıkada zamanaýı aqparattyq tehnologııalardy paıdalana otyryp, ıaǵnı planshetterdiń kómegimen ınternet arqyly halyq sanaǵyn júrgizýdi josparlap otyrmyz. 2020 jyly bul is-shara pandemııaǵa baılanysty keıinge qaldyryldy», - dep málim etti Kobıl Berdıkýlov.
Ózbekstan prezıdentiniń 2024 jylǵy 4 naýryzdaǵy qaýlysyna saı, Statıstıka agenttigi bıyl sanaqqa daıyndyq jumystaryn jalǵastyrýy tıis. Atap aıtqanda, vedomstvoǵa halyq sanaǵyn nasıhattaý úshin beınerolık, bannerler men býkletter ázirleý, 2021 jyly júrgizilgen pılottyq sanaq nátıjeleri men halyqaralyq sarapshylardyń usynysyn eskerip, salany jetildirý tapsyryldy.
Halyq sanaǵynyń nátıjesin ázirleý jáne jarııalaý 2026-2027 jyldarǵa josparlanyp otyr.
Toqtala keteıik, Ózbekstanda halyq sanaǵy 1989 jyldan beri júrgizilmegen. Pandemııaǵa baılanysty ol 2022 jyldan 2023 jyldyń qarashasyna aýystyryldy, degenmen bul sharaǵa áli qarajat bólinbegen.
Qosa ketsek, bıyl 1 qańtardaǵy Statıstıka agenttiginiń málimetine saı, Ózbekstandaǵy turaqty halyq sany - 36 799 756 adam. 2023 jyldyń sáıkes kezeńine qaraǵanda byltyrǵy ósim 2,2% shamasynda boldy.
