Ózbekstanda gaz óndirisi tómendep barady

TAShKENT. KAZINFORM – Qańtar-maýsym aralyǵynda Ózbekstanda óndirilgen gaz 5,1%-ǵa tómendedi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Statıstıka agenttiginiń málimetinshe, alǵashqy jartyjyldyqta Ózbekstannyń iri kásiporyndary 22,36 mlrd tekshe metr gaz óndirdi. Bul ótken jyldyń sáıkes kezeńimen salystyrǵanda 1,2 mlrd tekshe metrge az. 

Aıta keteıik, Energetıka mınıstrligi eldegi gaz óndirisiniń keıingi 4 jylda rekordtyq quldyraýyna túsinik bergen edi. Vedomstvonyń aqparatyna saı, oǵan «Qandym» gaz óńdeý zaýytyndaǵy josparly jóndeý jumystary jáne basqa da tehnologııalyq máseleler sebep. 

Gazdyń kólemi tómendegenimen, kórshi el kómir óndirisin arttyrdy. Atap aıtqanda, ózbekstandyq shahterler jarty jylda 2,64 mln tonna qatty otyn qazyp aldy. Bul ótken jyldyń sáıkes kezeńine qaraǵanda 148 myń tonnaǵa artyq.