Ózbekstanda gaz quıý stantsııasynda jarylys boldy
TAShKENT. KAZINFORM – 16 shilde kúni keshqurym Tashkent oblysynyń Zangıata aýdanyndaǵy M-39 tasjoly boıynda ornalasqan gaz quıý stantsııasynda jarylys boldy, dep habarlaıdy Kazinform agenttiginiń Tashkenttegi menshikti tilshisi.
Tótenshe jaǵdaılar mınıstrliginiń málimetinshe, gaz saqtaýǵa arnalǵan rezervýar men atalǵan otyndy tasymaldaıtyn kólik jarylǵan. Oqıǵa týraly habar saǵat 22:46-da túsken. Órt bir saǵattan keıin sóndirildi.
Oqıǵa saldarynan úsh adam túrli dene jaraqatyn alyp, aýrýhanaǵa jetkizilgen.
Eske salaıyq, bıyl maýsymda Ózbekstanda janarmaı beketinde bolǵan jarylystan 6 adam qaza tapqan edi.
Sondaı-aq jyl basynan beri Ózbekstanda jazataıym oqıǵalardan 90 adam kóz jumdy.
