Ózbekstanda gaz quıý stantsııalarynyń jumysyna shekteý engizildi

TAShKENT. KAZINFORM — 8 qańtardan bastap Ózbekstandaǵy gaz quıý stantsııalary saǵat 10:00–den 16:00–ge deıin ǵana qyzmet kórsetip jatyr, dep habarlaıdy Kazinform agenttiginiń menshikti tilshisi. 

Energetıka mınıstrliginiń málimetinshe, shekteýler jergilikti ákimdiktermen kelise otyryp engizildi.

— Bul sheshim magıstraldyq gaz qubyrlaryndaǵy qysymnyń tómendeýine baılanysty qabyldandy. Bul kezeńde gaz birinshi kezekte turǵyn úılerge, qoǵamdyq kólikterge jáne áleýmettik nysandarǵa baǵyttalady, — delingen vedomstvonyń habarlamasynda.

Mınıstrlikten málim etkendeı, atalǵan shekteýler ýaqytsha engizildi. Qazirgi ýaqytta gaz qysymyn qalpyna keltirý boıynsha jumys júrip jatyr.

Eske salaıyq, byltyr jeltoqsanda ımporttyń tómendeýinen Ózbekstandaǵy gaz quıý stantsııalarynyń jumysyna shekteý engizilgen edi.

Buǵan deıin habarlaǵanymyzdaı, Ózbekstanda gaz óndirisi tómendep barady. 2025 jyly 10 aıda kórshiles elde 35,5 mlrd tekshe metr gaz óndirildi, bul 2024 jyldyń sáıkes kezeńimen salystyrǵanda 5,3%-ǵa az.

Qosa ketsek, byltyr Tashkent oblysynyń ustazdarymen kezdesken Ózbekstan prezıdenti Shavkat Mırzıeev Ústirt óńirinde 6500 metr tereńdikte ornalasqan iri gaz ken orny tabylǵanyn málim etti.