Ózbekstanda gaz quıý stantsııalarynyń jumys ýaqyty taǵy da qysqardy
Qysymynyń tómendeýine baılanysty 12 jeltoqsannan bastap Ózbekstandaǵy gaz quıý beketteri kúnine tek 6 saǵat jumys isteıdi. ıAǵnı, jańa kestege saı, stantsııalar 6:00-den 12:00-ge deıin qyzmet kórsetedi, dep habarlaıdy Kazinform agenttiginiń menshikti tilshisi.
«Hýdýdgaztaımınot» kompanııasynan málim etkendeı, aýa raıynyń salqyndaýynan gaz qysymy tómendegen. Osyǵan oraı tıisti sheshim qabyldanyp otyr.
«Bul sharalar ýaqytsha jáne aýa temperatýrasynyń kúrt tómendeýi kezinde ǵana qoldanylady. Qazirgi tańda tapshylyq joq, gaz barlyq óńirlerge qajetti kólemde jetkizilip jatyr», - delingen kompanııanyń málimdemesinde.
Osyǵan baılanysty «Hýdýdgaztaımınot» jekelegen aýdandar men úılerde tapshylyq bolmas úshin azamattardan gazdy tek negizgi qajettilikter úshin paıdalanýdy, al úıden shyqqan kezde jylytý jabdyqtaryn óshirip ketýdi surady.
Eske salaıyq, gaz quıý beketteriniń jumys ýaqyty buǵan deıin de shektelgen edi. Atap aıtqanda, stantsııalar 9 jeltoqsannan bastap 6:00-den 15:00-ge deıin qyzmet kórsetip keldi.
