Ózbekstanda gaz quıatyn janarmaı stantsııalarynyń jumys ýaqyty shekteldi
Ózbekstanda kún sýytyp, turǵyndardyń gazǵa suranysynyń artýyna baılanysty janarmaı quıý beketteriniń jumys ýaqyty shekteldi, dep habarlaıdy Kazinform.
Ózbekstannyń Energetıka mınıstrligi áleýmettik jelilerde gaz quıatyn janarmaı stantsııalarynyń jumysyndaǵy úzilister týraly habarlamalar taralýyna baılanysty resmı túsinikteme berdi.
Vedomstvoda atap ótkendeı, 16 jeltoqsanǵa deıin sozylatyn salqyn kún raıyna baılanysty turǵyndardyń gazǵa suranysy artyp, bul gaz qysymynyń aıtarlyqtaı tómendeýine ákelgen.
«Osynyń negizinde turǵyndardy tabıǵı gazben úzdiksiz qamtamasyz etý maqsatynda metan gaz quıý beketteriniń jumys ýaqytyn shekteý sharalary qabyldanyp jatyr. Jospar boıynsha metan janarmaı quıý beketteri tańǵy 6:00-den 15:00-ge deıin jumys isteıdi. Bul ýaqytsha shekteý respýblıka boıynsha tutynýshylar men áleýmettik nysandardy kógildir otynmen qamtamasyz etý maqsatynda engizildi», - dep habarlady vedomstvodan.
Eldiń Energetıka mınıstrligi qolaısyzdyqtar úshin keshirim surap, tutynýshylardy jaǵdaı turaqtalǵansha únemdeýge shaqyrdy.
Eske sala ketsek, Ózbekstanda ótken jylǵy qysta respýblıka úshin qalyptan tys aıaz aıasynda elektr qýatyn, gaz jáne jylýdy jetkizýde aýqymdy úzilister bolǵan bolatyn. Ózbekstan astanasy men oblystarynda dalalyq áskerı ashanalar men jylytý pýnktteri ornalastyryldy.
