Ózbekstanda ǵaz baǵasyn negizsiz kótergen kompanııalarǵa qatysty is qozǵaldy

TAShKENT. KAZINFORM — Ózbekstannyń Básekelestik jónindegi komıteti suıytylǵan gaz baǵasyn negizsiz qymbattatqan kompanııalarǵa qatysty is qozǵady, dep habarlaıdy Kazinform agenttiginiń menshikti tilshisi.

Byltyr qarasha–jeltoqsan aılarynda ýaqytsha engizilgen shekteýge baılanysty vedomstvo kompanııalarǵa baǵany kótermeýdi eskertken bolatyn. Alaıda, birqatar kásiporyn básekelestik qaǵıdatyna qaıshy áreketterge barǵan. 

— Osy faktiler boıynsha tekserý bastalyp, is qozǵaldy. Sonymen qatar, bırjada baǵany turaqtandyrý boıynsha sharalar qabyldanyp jatyr. Kompanııalarǵa gaz qunyn shekti mejede ustap turý jóninde nusqaý joldandy, - dep atap ótti komıtetten.

Eske salaıyq, Ózbekstanda ımporttyń artýyna baılanysty suıytylǵan gaz baǵasy ósti.

Sondaı-aq, 8 qańtardan bastap Ózbekstanda gaz quıý stantsııalarynyń jumysyna shekteý engizildi. 

Buǵan deıin habarlaǵanymyzdaı, Ózbekstanda gaz óndirisi tómendep barady. 2025 jyly 10 aıda kórshiles elde 35,5 mlrd tekshe metr gaz óndirildi, bul 2024 jyldyń sáıkes kezeńimen salystyrǵanda 5,3%-ǵa az.