Ózbekstanda fastfýd pen energetıkalyq sýsyndardyń jarnamasyna shekteý engizilmek

Ózbekstan úkimeti balalarǵa arnalǵan fastfýd pen energetıkalyq sýsyndardy jarnamalaýǵa shekteý qoımaq. Sondaı-aq mektep pen balabaqsha ashanalarynda tutynýǵa bolmaıtyn taǵamdardyń tizimi ázirlenedi, dep habarlaıdy Kazinform agenttiginiń menshikti tilshisi.

Ózbekstannyń Densaýlyq saqtaý mınıstrligi «Halyq densaýlyǵy – 2030» ulttyq strategııasynyń jobasyn ázirledi. Qujatqa saı, ózbekstandyqtar arasyndaǵy semizdik dertin azaıtý josparlanyp otyr.

«2030 jyldyń sońyna qaraı semizdikke shaldyqqan halyqtyń úlesin - 50%, al balalar men jastar arasyndaǵy kórsetkishti 30%-ǵa qysqartý mindeti qoıylyp otyr», - dep atap ótti mınıstrliktiń baspasóz qyzmetinen.

Bul maqsatqa balabaqsha men mektepterde durys tamaqtanýdy nasıhattaý arqyly qol jetkizý kózdelgen. Osylaısha, bilim berý mekemelerinde qoldanýǵa usynylmaıtyn ónimderdiń tizimi jasalady. Olarǵa qant, tuz, maılylyǵy joǵary taǵamdar, sondaı-aq hosh ıistendirgishter men boıaǵyshtar kiredi.

Strategııada jazylǵandaı, balalarǵa arnalǵan zııandy taǵamdardy, energetıkalyq sýsyndardy, dári-dármekter men dıetalyq qospalardy jarnamalaýǵa qosymsha shekteý engiziledi.

Buǵan qosa, balalardyń jasyna, dene bitimine, ómir saltyna, qandaı da bir dertke beıimdiligine qaraı durys tamaqtaný, dene shynyqtyrý jáne gıgıena boıynsha usynystar ázirlenbek. Bul jumystar osy jyldyń sońyna deıin júrgiziledi.

Qosa ketsek, buǵan deıin Ózbekstanda energetıkalyq sýsyndarǵa aktsızdik salyq engiziletinin habarlap edik.