Ózbekstanda eresek halyqtyń jartysynan kóbi vaktsınanyń birinshi dozasyn aldy

TAShKENT. QazAqparat – Ózbekstanda 18 jastan asqan turǵyndardyń jartysynan kóbi koronavırýsqa qarsy vaktsınanyń birinshi dozasyn saldyrdy, dep habarlaıdy QazAqparattyń menshikti tilshisi.

Ózbekstan Respýblıkasy Densaýlyq saqtaý mınıstrliginiń málimetinshe, elde 18 jastan asqan turǵyndardyń 21,44 mıllıony (jalpy sany – 34,5 mln adam) vaktsına alýǵa tıis.

Preparattyń birinshi dozasyn 11,5 mıllıon adam (53,6 paıyz) alyp úlgerdi.

Ózbekstandyqtardyń 4,6 mıllıony (21,2 paıyz) ekpeni tolyq saldyrdy.

Aımaqtar arasynda Ferǵana, Ándijan jáne Namanǵan oblystary kósh bastap tur. Munda vaktsınanyń birinshi dozasyn alǵandar sany 2 mıllıon adamnan asty.

Eske sala ketsek, Ózbekstanda ekpe naýqany 1 sáýirde bastalǵan.

Vaktsınalaý bes preparatpen júzege asyrylýda, olar: AstraZeneca, ZF-UZ-VAC2001, «Spýtnık-V», Moderna jáne Pfizer.

3 tamyzda respýblıkada jumys isteıtin turǵyndardy mindetti túrde vaktsınalaýdyń quqyqtyq negizin bekitken zań qabyldandy.

29 qyrkúıekten bastap Ózbekstanda 12 jastan asqan balalarǵa Pfizer vaktsınasyn erikti túrde egýge ruqsat etildi.