Ózbekstanda energııa resýrstaryn zańsyz paıdalaný áreketteri tyıylmaı tur

TAShKENT. KAZINFORM – Mamyr aıynda Ózbekstanda júrgizilgen tekseris barysynda energııa resýrstaryn zańsyz paıdalanýdyń 229 faktisi anyqtaldy, dep habarlaıdy Kazinform agenttiginiń menshikti tilshisi.

«Ózenergoınspektsııanyń» aqparatyna sáıkes, ózbekstandyqtardyń mundaı áreketinen bolǵan shyǵyn – 94,8 mlrd sým (shamamen $7,4 mln).

Qamtylyp otyrǵan aralyqta 13,2 mln tekshe metr kógildir otyn zańsyz paıdalanylyp, saldarynan 36,9 mlrd sým ($2,9 mln) zalal keldi.

Sonymen qatar elektr energııasy júıesine zańsyz qosylǵan turǵyndar memleketke 57,9 mlrd sým ($4,5 mln) shyǵyn keltirdi.

Anyqtalǵan faktiler negizinde 448 ákimshilik hattama toltyryldy. Tolyq mán-jaıdy anyqtaý úshin iske qatysty barlyq materıal quqyq qorǵaý organdaryna joldandy.

Buǵan deıin habarlaǵanymyzdaı, bir aptada ózbekstandyqtar 2,9 mln dollardyń gazy men elektr qýatyn zańsyz paıdalanǵan. Al byltyr energetıkalyq resýrstardy zańsyz paıdalanǵan turǵyndar memleketke $108 mln shyǵyn keltirgen edi.