Ózbekstanda elektrondy temekini ımporttaýǵa jáne óndirýge tyıym salý usynyldy

TAShKENT. KAZINFORM – Ózbekstannyń Densaýlyq saqtaý mınıstrligi elge elektrondy temekini ákelýge jáne satýǵa tyıym salýdy usynyp otyr, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Vedomstvonyń málimetinshe, 2021-2023 jyldary Ózbekstanǵa zańdy túrde 28,5 mln dollarǵa baǵalanǵan 5,4 mln dana elektrondy temeki ákelingen. Sonymen qatar osy aralyqta quny 11,8 mlrd sým bolatyn temeki buıymdaryn zańsyz ımporttaý faktileri tirkeldi. 

Monıtorıng kórsetkendeı, Ózbekstanda jastar elektrondy temekini eresekterge qaraǵanda úsh ese kóp paıdalanady. Negizinen ony shegýge mektep oqýshylary beıim keledi: 26,6 myń ul jáne 8,6 myń qyz.

Mınıstrlikten málim etkendeı, eger buǵan qarsy shara qoldanylmasa, bolashaqta árbir besinshi ózbekstandyq nıkotınge táýeldilikten zardap shegedi.

Osyǵan baılanysty vedomstvo respýblıka aýmaǵynda elektrondy temekini ákelýge jáne óndirýge tyıym salýdy kózdeıtin zań jobasyn ázirlep, ony ashyq talqylaýǵa shyǵardy. Endi atalǵan baǵyttaǵy quqyq buzýshylyqtar úshin ákimshilik jáne qylmystyq jaýapkershilik belgilenbek.

Qosa ketsek, QR Ulttyq statıstıka bıýrosy júrgizgen saýalnama nátıjesine sáıkes, Qazaqstan halqynyń 20% jýyǵy temeki shegedi.