Ózbekstanda ekologııalyq qylmys úshin jaza kúsheıtilmek
ASTANA. KAZINFORM – Elde zańsyz ańshylyq pen brakonerliktiń saldarynan flora men faýna túrleriniń sany azaıyp, ekologııalyq jaǵdaı nasharlaǵan. Bul halyqtyń narazylyǵyn týǵyzyp otyr, dep habarlaıdy UZA.
Bul máselege Senattyń jalpy otyrysynda kóterildi. Qurylys jáne basqa da jumystar kezinde hımııalyq, bıologııalyq jáne bakterıologııalyq quraldardy paıdalanyp aǵashtardy qasaqana zaqymdaý baıqalatyny, elektr qýaty men jarylǵysh zattardy paıdalanyp balyq aýlaý jaǵdaılary jıilep, bul balyq qorynyń azaıyp, balyqtardyń joıylyp ketýine ákelip soǵatyny aıtyldy.
Qoldanystaǵy zańnamada bul úshin jeńil jaza qarastyrylǵany brakonerlerge tıimdi bolyp tqr. Ekologııa jáne qorshaǵan ortany qorǵaý organdarynyń memlekettik ınspektorynyń zańdy qyzmetine kedergi keltirgeni, onyń nusqaýlaryn oryndamaǵany úshin belgilengen sanktsııa osy saladaǵy quqyq buzýshylyqtyń aldyn alýdyń tıimdi bolýyna múmkindik bermeıdi.
Usynylyp otyrǵan «Ózbekstan Respýblıkasynyń keıbir zańnamalyq aktilerine ósimdikter men janýarlar dúnıesin qorǵaýdy kúsheıtýge baǵyttalǵan tolyqtyrýlar men ózgerister engizý týraly» Zańy qoldanystaǵy eki kodekske jáne eki zańǵa ózgerister men tolyqtyrýlar engizýdi kózdeıdi.
Atap aıtqanda, ósimdikter men janýarlar dúnıesin paıdalaný tártibin buzǵany úshin jaýapkershilikti kúsheıtýge baǵyttalǵan Qylmystyq kodekske ózgerister men tolyqtyrýlar engizilmek. Elektr toǵyn, jarylǵysh jáne hımııalyq zattardy, bıologııalyq preparattardy qoldanyp ań aýlaǵany nemese balyq aýlaǵany úshin quqyq buzýshy negizgi eseptik birliktiń tórt júzden alty júzge deıingi mólsherinde aıyppul salýǵa ne belgili bir quqyqtan aıyra otyryp, úsh jyldan bes jylǵa deıingi merzimge bas bostandyǵyn shekteýge nemese 3 jyldan 7 jylǵa deıin bas bostandyǵynan aıyrý qarastyrylǵan. Aýyrlatatyn mán-jaılar boıynsha qosymsha jaza retinde belgili bir quqyqtardan aıyrý túrindegi jaza da engiziledi.
Ańshylyq jáne balyq aýlaý erejelerin, janýarlar dúnıesin paıdalanýdyń ózge de túrlerin paıdalaný erejelerin buzǵany úshin Ákimshilik jaýapkershilik týraly kodekste kózdelgen aıyppul mólsheri de eki esege ulǵaıtylmaq.
Ańshylyq jáne balyq aýlaý erejelerin, janýarlar dúnıesin paıdalanýdyń ózge de túrleri erejelerin buzǵany, memlekettik ekologııalyq ınspektordyń zańdy qyzmetine kedergi keltirgeni, onyń nusqaýlaryn oryndamaǵany úshin de jaýapkershilik kúsheıtilmekshi.
Bul azamattarǵa 5-ten 10-ǵa deıin, al laýazymdy tulǵalarǵa 20-dan 30 BRV-ǵa deıin aıyppul salýdy kózdeıdi.
Senatorlar maquldaǵan zań aldaǵy ýaqytta ekologııalyq turaqtylyqty qamtamasyz etýge, Ózbekstannyń tabıǵı resýrstaryn qorǵaýǵa qyzmet etpek.
