Ózbekstanda eki apta ishinde 200 myńnan astam adamǵa ekpe salyndy
TAShKENT. QazAqparat – Ózbekstanda alǵashqy eki apta ishinde koronavırýsqa qarsy vaktsınanyń birinshi dozasyn 200 myńnan astam adam saldyrdy, dep habarlaıdy QazAqparat menshikti tilshisi.
Ózbekstan Respýblıkasynyń Densaýlyq saqtaý mınıstrliginiń málimetinshe, búgingi kúnde elde 216 087 adamǵa ekpe salyndy, keshe 67 445 azamat vaktsınalandy.
Rekord Ferǵana oblysynda ornady, onda dúısenbi kúni 18 myńnan astam adam egilgen. Osylaısha atalǵan óńir vaktsınalanǵandar sany boıynsha (18 363 azamat) kósh bastady.
Reıtıngide ekinshi orynǵa Andıjan oblysy jaıǵasty. Munda keshe vaktsına 11 667 turǵynǵa salynǵan. Óńirde barlyǵy 27 786 adam vaktsınalanǵan.
Úshinshi orynda – 25 327 turǵyny vaktsına alǵan Namangan oblysy. Bul óńirde keshe 8 397 azamat vaktsınalandy.
Eske sala keteıik, Ózbekstanda halyqty vaktsınalaý sáýirde - iri qalalarda, mamyrda - aýdan ortalyqtary men shaǵyn qalalarda, al maýsymda - aýyldyq jerlerde jalǵasady. Vaktsınatsııa eki preparatpen júzege asyrylady. Olar: AstraZeneca eýropalyq vaktsınasy jáne qytaı-ózbek ZF-UZ-VAC2001 vaktsınasy.
