Ózbekstanda doıbydan ótken Azııa chempıonatynda Qazaqstan quramasy úzdik atandy
NUR-SULTAN. QazAqparat - Tashkentte doıby 64-ten erler, áıelder jáne jas erekshelikterine qaraı jastar arasynda ótken Azııa chempıonatynda Qazaqstan quramasy úzdik atandy, dep habarlaıdy QazAqparat tilshisi.
BQO dene shynyqtyrý jáne sport basqarmasynan túsken málimetke qaraǵanda, qurlyq birinshiligine Japonııa, Qytaı, Mońǵolııa, Kýveıt, Qazaqstan, Tájikstan jáne Ózbekstan elderinen 170 doıbyshy qatysyp, baq synady.
Qazaqstan quramasy doıbynyń klassıka túrinen jeti birdeı altyn medaldi jeńip alyp, jalpykomandalyq esepte birinshi orynǵa ıe boldy.
Klassıkadan 4 altyn medal alǵan batysqazaqstandyq doıbyshylar jalpy jeńiske qomaqty úlesterin qosty.
Áıelder arasynda úzdik shyqqan Altynaı Jumageldıeva halyqaralyq grossmeıster talabyn oryndady. Sondaı-aq 17 jasqa deıingiler arasynda Ádilhan Meıram men Elızaveta Bapıeva, 13 jasqa deıingilerden Toǵjan Tájibekova chempıon atandy.
Sonymen qatar 15 jasar Anel Dáýletova aıdy aspanǵa shyǵaryp, áıelder arasynda qola júldege ıe boldy. 10 jasqa deıingilerden Aıbek Esenǵalıev úshinshi orynǵa kóterildi.
Doıbynyń blıts túrinen 17 jasqa deıingi bozbalalar arasynda synǵa túsken Anel Dáýletova, 17 jasqa deıingi qyzdardan Elızaveta Bapıeva, 13 jasqa deıingi qyzdardan Toǵjan Tájibekova jeńimpaz atandy. 10 jasqa deıingilerden Alına Bapaeva qola júldeni enshiledi.
