Ózbekstanda dollar baǵamy quldyrady

TAShKENT. KAZINFORM – Búgin Ózbekstanda AQSh dollary 34 sým 23 tıynǵa arzandap, 11 990 sýmǵa teńeldi. Bul dollardyń sońǵy eki jylda tirkelgen eń tómen baǵamy, dep habarlaıdy Kazinform agenttiginiń menshikti tilshisi.

Ortalyq banktiń málimetinshe, qazanda dollar 0,64%-ǵa quldyrady. Al jalpy jyl basynan beri Ózbekstannyń ulttyq valıýtasy 7,2%-ǵa nyǵaıdy. Atap aıtqanda, qańtardan bastap bir dollar 12 904 sýmnan 11 990 sýmǵa deıin arzandady.

Ózbekstan Ortalyq bankiniń tóraǵasy Tımýr Ishmetovtiń aıtýynsha, ulttyq valıýtanyń nyǵaıýy syrtqy qaryzdy jabýǵa baǵyttalatyn shyǵyndardy 4,9 trln sýmǵa qysqartty. Ol atap ótkendeı, eksportqa shyǵarylatyn taýarlardyń 15%-y jáne ımporttalatyn ónimderdiń 40%-y dollar baǵamyna tikeleı táýeldi.

Qosa keteıik, 2026 jyly Ózbekstan ishki jalpy ónim kólemin 150 mlrd dollardan asyrýǵa nıetti. Sondaı-aq, jyl basynan beri resmı Tashkent altyn eksportyn 70%-ǵa arttyrdy

Buǵan deıin habarlaǵanymyzdaı, bıylǵy 9 aıdyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy. Qamtylyp otyrǵan kezeńde resmı Tashkent Astanaǵa 1 mlrd dollardyń taýaryn eksporttap, 2,4 mlrd dollardan astam somaǵa ónim ımporttaǵan.