Ózbekstanda «Dok-1 Maks» shárbatynan qaıtys bolǵan balalardyń otbasylaryna ótemaqy tólenýi múmkin
TAShKENT. QazAqparat - Halyqaralyq baspasóz klýbynyń kezekti otyrysynda Ózbekstan Densaýlyq saqtaý mınıstriniń orynbasary Elmıra Bosıthonova qazir «Dok-1 Maks» shárbatyn iship qaıtys bolǵan balalardyń óliminiń sebebi anyqtalyp jatqanyn málimdedi.
Bul týraly QazAqparat ÓzA-ǵa silteme jasap habarlaıdy.
Mınıstrdiń orynbasarynyń aıtýynsha, Úndistannyń «Marion Biotech» kompanııasy shyǵarǵan «Dok-1 Maks» shárbatyn ishken balalardyń óliminiń sebebi rastalsa, olardyń otbasylaryna ótemaqy tólenýi múmkin.
Eger ótemaqynyń tolyq kólemi belgilense, qarjy dereý tólenedi.
Aqparat úshin aıta keteıik, «Marion Biotech» kompanııasynyń Ózbekstandaǵy dıstrıbıýtory «Kuramax Medical LLC» 2006 jyly tirkelgen. Sıngh Ragvendra Pratar, fırma basshysy. «Dok-1 Maks» shárbaty 2012 jyly memlekette tirkelip, satylymǵa shyǵarylǵan.
Ózbekstanda 2022 jylǵa deıingi «Dok-1 Maks» sertıfıkaty 2018 jyly berilgen. Resmı reestrge sáıkes, sońǵy 4 jylda bul preparattyń jańa serııasy ákelinbegen.
2022 jyly 5 qyrkúıek pen 13 jeltoqsan aralyǵynda preparattyń 11 serııasy sertıfıkattalǵany belgili boldy. Samarqand oblysy balalar kópsalaly medıtsınalyq ortalyǵynyń 15 jeltoqsandaǵy hatyna sáıkes, sońǵy 2 aıda «Dok-1 Maksqa» qatysty qaıǵyly jaǵdaılar oryn alǵan.
Osyǵan deıin Ózbekstanda «Dok-1 Maks» preparatyna baılanysty qylmystyq is qozǵalǵany habarlandy.
Ózbekstan prezıdenti Farmatsevtıka agenttiginiń basshysyn jumysynan bosatty.
Ózbekstan 15 balanyń ólimine sebep bolýy múmkin dárini satylymnan alyp tastady.
Avtor Begabat Uzaqov
