Ózbekstanda «Dok-1 Maks» preparatyna baılanysty qylmystyq is qozǵaldy

TAShKENT. QazAqparat - Ózbekstannyń Memlekettik qaýipsizdik qyzmeti (MQQ) 18 balanyń tumaýǵa qarsy úndi dárisinen keıin kóz jumý oqıǵasyna qatysty qylmystyq is qozǵady, dep habarlaıdy QazAqparat tilshisi.

Ózbekstannyń dárilik zattardy saraptaý jáne standarttaý memlekettik ortalyǵynyń qorytyndysyna sáıkes, «Dok-1 Maks» shárbaty belgilengen talaptarǵa saı bolmaı shyqqan.

«Dok-1 Maks» shárbatynda kezdesetin etılenglıkol zaty naýqastyń densaýlyǵyna keri áserin tıgizedi. Qazirgi ýaqytta ımporttaýshy kompanııa «Quramax Medical» JShQ jáne «Dárilik zattardy standarttaý ǵylymı ortalyǵy» JShQ laýazymdy tulǵalaryna qatysty qylmystyq is qozǵaldy. Kúdiktiler ýaqytsha ustaý ızolıatoryna qamaldy», - delingen Ózbekstan memlekettik qaýipsizdik qyzmeti habarlamasynda.

Eske salsaq, 27 jeltoqsanda Ózbekstan Densaýlyq saqtaý mınıstrligi «Dok-1 Maks» preparatyn qabyldaǵan 18 balanyń kóz jumǵanyn rastaıtyn tekserý nátıjesin jarııalady. Al Qazaqstan bıligi bul dáriniń elde tirkelmegenin jáne satylymda joq ekenin habarlady.