Ózbekstanda depýtattyqqa kandıdattardyń saılaýaldy naýqany bastaldy
TAShKENT. QazAqparat – 18 qarasha kúni Ózbekstanda Olıı Majlıstiń Zań shyǵarýshy palatasyna, sondaı-aq jergilikti keńesterge depýtat bolýǵa kandıdattardyń saılaýaldy úgit-nasıhat naýqany bastaldy, dep habarlaıdy «QazAqparat» HAA-nyń menshikti tilshisi.
ÓR Saılaý kodeksiniń 44-babyna sáıkes, saılaý aldyndaǵy naýqan kandıdattardy tirkeýdiń sońǵy kúninen keıingi kúni bastalady. Saılaý kúni jáne saılaý aldyndaǵy tynyshtyq kúni úgit júrgizilmeıdi.
Eske sala keteıik, Ózbekstanda depýtattarǵa daýys berý 22 jeltoqsanda ótýi tıis. Eldiń Ortalyq saılaý komıssııasy bıylǵy naýqan burynǵydan ózgerek ekenin málimdedi.
Aıta keteıik, bıylǵy naýqan men daýys berý ÓR Saılaý kodeksi negizinde ótkiziledi. Oǵan sáıkes, eldiń bes saıası partııasy kandıdat usynyp otyr. Olar: Ózbekstannyń «Ulttyq jańǵyrý» demokratııalyq partııasy, Ózbekstannyń Halyq-demokratııalyq partııasy, Kásipkerler men iskerler qozǵalysy - Ózbekstannyń lıberal-demokratııalyq partııasy, «Ádilet» sotsıaldy-demokratııalyq partııasy, Ózbekstannyń Ekologııalyq partııasy.
Saılaý kodeksine sáıkes, daýys berý úshin biryńǵaı saılaý bıýlleteni engizilip, «saılaý paraǵy» uǵymy joıyldy.
Saılaý jáne oǵan daıyndyq naýqanyn 50-ge jýyq el men halyqaralyq uıymdardyń 600-den astam baqylaýshysy baqylap otyrady.
Elde 16 myń saılaý okrýgi men ýchaskelik komıssııalar qurý josparlanǵan.
Avtory: Mıras Qýandyqov
