Ózbekstanda dáriden balalardyń qaıtys bolýy: Farmatsevtıka agenttiginiń eks-basshysy ustaldy

Sybaılas jemqorlyqqa qarsy kúres agenttiginiń Farmatsevtıkalyq jelini damytý agenttigi men oǵan qarasty Dárilik zattardy, medıtsınalyq maqsattaǵy buıymdar men medıtsınalyq tehnıkany saraptaý jáne standarttaý memlekettik ortalyǵymen júrgizgen zertteý nátıjelerine sáıkes, kóptegen qarjylyq qateler jáne kemshilikter oryn alǵany anyqtaldy. Bıýdjet qarajatyn jumsaý kezinde belgilengen talaptardy óreskel buzý faktileri boıynsha qylmystyq is qozǵaldy. Qazirgi ýaqytta tergeýdi Memlekettik qaýipsizdik qyzmeti tergeý basqarmasy júrgizip jatyr.

Sondaı-aq «DOK-1 MAKS» pen «AMBRONOL» shárbatynyń janama áserinen «jedel búırek jetkiliksizdigi» dıagnozymen balalardyń ólimine qatysty qylmystyq isti tergeý aıasynda birqatar laýazymdy tulǵa qamaýǵa alyndy.

«Atap aıtqanda, jınalǵan aıǵaqtardyń negizinde Farmatsevtıkalyq jelini damytý agenttiginiń jáne onyń janyndaǵy Dárilik zattardy, medıtsınalyq maqsattaǵy buıymdar men medıtsınalyq tehnıkany saraptaý jáne standarttaý memlekettik ortalyǵynyń dırektory K.S. jáne onyń jasalǵan qylmystarǵa qatysy bar birneshe sybaılasy kúdikti retinde ustalyp, olarǵa qamaýǵa alý túrindegi bultartpaý sharasy qoldanyldy.

Alǵashqy tergeý barysynda Ózbekstanǵa sapasyz dári-dármektiń ákelinýi men tutynylýyna jol bergen jaýapty tulǵalardyń aýqymyn anyqtaýǵa, olardyń áreketine quqyqtyq baǵa berýge baǵyttalǵan keshendi tergeý jáne jedel is-sharalar men tıisti saraptamalar júrgizilýde», - dep habarlady agenttik.

Farmatsevtıkalyq jelini damytý agenttiginiń basshysy ótken jyldyń sońynda jumystan bosatylǵan bolatyn.

Eske salaıyq, Ózbekstanda ótken jyldyń qyrkúıek-jeltoqsan aılarynda 19 balanyń ólimi tirkelgen edi. Oǵan úndilik Marion Biotech kompanııasy shyǵarǵan DOK-1 Maks preparatyn qabyldaý sebep bolǵan. 7 qańtarda joǵaryda atalǵan sıropty ishken taǵy bir balanyń qaıtys bolǵany anyqtaldy. El prezıdenti Farmatsevtıka agenttiginiń basshysyn jumysynan bosatty. Elde qylmystyq is qozǵaldy. Al Qazaqstan bıliginiń málimetinshe, bul dári elimizde tirkelmegen jáne satylymda joq.

Keıin Ózbekstanda medıtsınalyq maqsatta qoldanylatyn taǵy bir preparat - «Ambronoldyń» talapqa saı kelmeıtini málim etildi.