Ózbekstanda COVID-19 juqtyrý boıynsha taǵy da antırekord tirkeldi
TAShKENT. QazAqparat – Ózbekstanda pandemııa bastalǵannan beri táýliktik juqtyrý sany boıynsha jańa antırekord tirkeldi, dep habarlaıdy QazAqparattyń menshikti tilshisi.
Ózbekstannyń Densaýlyq saqtaý mınıstrliginiń derekterine saı, ótken táýlikte 843 adam koronavırýs juqtyrǵan, bul – pandemııanyń basynan bergi eń joǵary kórsetkish. Buǵan deıin sońǵy kúnderi juqtyrý boıynsha antırekord kelesideı jańaryp otyrǵan: 789, 719, 698, 658 jáne 585.
Statıstıkaǵa sáıkes, bunyń aldyndaǵy eń joǵary kórsetkish 2020 jyldyń 1 tamyzynda tirkelgen. Ol kúni el aýmaǵynda 774 adam koronavırýs juqtyrǵan.
Sonymen qatar bir kúnniń ishinde 556 adamnan kovıdti pnevmonııa anyqtalǵan. Bir kún buryn bul kórsetkish 521 bolǵan. Odan bólek, COVID-19-dan segiz adam qaıtys bolǵan. Pandemııanyń basynan beri eldegi qaıtys bolǵandardyń jalpy sany – 853.
Eske sala keteıik, epıdemıologııalyq ahýaldyń nasharlaýyna baılanysty Ózbekstanda 28 shildeden bastap karantındik sharalar kúsheıtilgen. 17 shildeden bastap Koronavırýspen kúres jónindegi arnaıy komıssııa 18 jastan joǵary saýda, qoǵamdyq tamaqtandyrý, qyzmet kórsetý jáne bilim salalarynda jumys isteıtin azamattardy, sonymen qatar áskerıler men quqyq qorǵaý organdarynda qyzmet etetin adamdardy mindetti vaktsınalaý týraly sheshim qabyldady. Qazirgi kezde Ózbekstan Respýblıkasynyń Parlamenti halyqtyń jumys isteıtin bóligin mindetti vaktsınalaý týraly zań jobasyn qarastyrýda.
