Ózbekstanda COVID-19 naýqastaryn emdeıtin klınıkada ottegi ballony jaryldy
TAShKENT. QazAqparat – 7 qazan kúni saǵat 08:13-te Syrdarııa oblysynyń Gúlstan qalasyndaǵy «Alpomısh» sport kesheninde ottegi ballony jaryldy, dep habarlaıdy QazAqparat Ózbekstan Respýblıkasy Tótenshe jaǵdaılar mınıstrliginiń Telegram-daǵy resmı paraqshasyna silteme jasap.
«Oqys oqıǵa bolǵan sport kesheni qazirgi tańda koronavırýs ınfektsııasyn juqtyrǵan naýqastarǵa medıtsınalyq kómek kórsetý úshin ýaqytsha klınıka retinde jasaqtalǵan.
Ottegi ballonynyń jarylýy saldarynan ǵımarattyń terezeleri synyp, bir azamat jaraqat aldy. Qaza tapqandar joq. Oblystyq tótenshe jaǵdaılar basqarmasy men basqa da tıisti organdar dereý oqıǵa ornyna kelip, azamattardy qaýipsiz jerge kóshirdi. Jaǵdaı tolyq baqylaýda», - dep jazdy Ózbekstan Respýblıkasy Tótenshe jaǵdaılar mınıstrligi Telegram-daǵy resmı paraqshasynda.
