Ózbekstanda Comedy Club-qa tyıym salynǵan

MÁSKEÝ. KAZINFORM — Teleshoý «ádeptilik normalaryna saı kelmegeni úshin» tyıymǵa ushyrady, dep habarlaıdy agenttik tilshisi SHOT Telegram-arnasyna silteme jasap.

Eldiń Mádenıet mınıstrligi gastroldik ártisterdiń óner kórsetýine qatysty uıymdastyrýshylarǵa shekteýler men usynystar jiberip otyrady.

Uıymdastyrýshylardyń aıtýynsha, tyıymdar eki jyl buryn bastalǵan.

Sol kezde el astanasy Tashkentte «Mýzykalyq Comedy Club» shoýyn ótkizý josparlanǵan edi, biraq ol «tehnıkalyq sebepterge» baılanysty keıinge qaldyrylǵan.

Ótkiziletin kúnder áli kúnge deıin belgilenbegen. Uıymdastyrýshylardyń aıtýynsha, shyn máninde eldiń Mádenıet mınıstrligi resmı hat joldap, onda «shoýda kórsetiletin otbasylyq, erli-zaıyptylyq, er-áıel qatynastary ulttyq rýhanııatqa qaıshy keledi» dep jazǵan.

SHOT Telegram-arnasy mundaı jaǵdaılardyń jıi kezdesetinin atap ótti. Baǵdarlamalar muqııat tekserilip, «eldiń moraldyq normalaryna» sáıkes bolý úshin túzetýler engizý talap etiledi.

Sondaı-aq, bıyl Alekseı Şerbakovtyń stendap-nómirinen keıbir ázilderdi alyp tastaýdy suraǵan, al T-Fest kontserti múldem toqtatylǵan.

2023 jyly Comedy Club-pen qatar Grıgorıı Leps, Irına Dýbtsova, Dıana Arbenına jáne Zemfıranyń kontsertteri de aýystyrylǵan bolatyn.

Osyǵan deıin qazaqstandyq stend-ap komık Nurlan Sabyrov Máskeýdegi Sheremetevo áýejaıynda kóshi-qon zańnamasyn buzǵany úshin ustalǵany anyqtaldy.