Ózbekstanda býkmekerlik keńselerdiń qyzmetin nasıhattaǵan 70-ge jýyq saıt buǵattaldy
TAShKENT. KAZINFORM – Ózbekstanda qumar oıyndardy nasıhattaǵan 70-ke jýyq ınternet-resýrs buǵattaldy, dep habarlaıdy Kazinform agenttiginiń menshikti tilshisi.
Básekelestikti damytý jáne tutynýshylardyń quqyǵyn qorǵaý komıtetiniń aqparatynsha, vedomstvo qumar oıyndy jarnamalaıtyn saıttardy anyqtaý boıynsha turaqty monıtorıng júrgizedi. Sonyń nátıjesinde bıyl tıisti organdarǵa býkmekerlik keńselerdiń qyzmetin nasıhattaǵan 86 ınternet-resýrsty buǵattaý týraly hat joldandy. Tıisinshe, búginde olardyń 70-ke jýyǵyna tyıym salyndy.
Eske salaıyq, byltyr jeltoqsanda Ózbekstanda áskerı qyzmetshilerdiń kazıno oınaýyna tyıym salyndy. Tıisti zańǵa kórshiles eldiń prezıdenti Shavkat Mırzıeev qol qoıdy.
Qosa ketsek, endi ózbekstandyqtar alaıaqtar rásimdegen nesıelerdi tóleýden bosatylmaq. Sondaı-aq, taıaýda Ózbekstan prezıdenti Shavkat Mırzıeev veıp, oǵan arnalǵan hosh ıistendirgish pen suıyqtyq ákelýge, satýǵa jáne taratýǵa tyıym salatyn zańǵa qol qoıdy.