Ózbekstanda boı kóteretin AES alańynda beton quıý jumystary bastaldy
TAShKENT. KAZINFORM – Búgin Tashkentte «Rosatom» men «Uzatom» basshylary AES jobasynyń jańartylǵan josparyna, sondaı-aq uzaqmerzimdi yntymaqtastyq Jol kartasyna qol qoıdy, dep habarlaıdy Kazinform agenttiginiń Tashkenttegi menshikti tilshisi.
Qujattardy ózara is-qımyldyń basym baǵyttary aıqyndalǵan. Atap aıtqanda onda AES qurylysy, bilikti kadrlardy daıarlaý, atom qalashyǵyn damytý josparlary qamtylǵan.
Bul is-sharamen birge Jızaq oblysynyń Farısh aýdanyndaǵy eki az qýatty rekator boı kóteretin alańda beton quıý jumystaryn bastaýǵa arnalǵan saltanatty rásim ótti. Oǵan AES qurylysy dırektsııasynyń dırektory Abdıjamıl Kalmýratov jáne «Atomstroıeksport» AQ Ózbekstandaǵy AES jobasynyń dırektory Pavel Bezrýkov qatysty.
Qazirgi ýaqytta energııa bloktary ornalasatyn ǵımarattyń negizi qalanyp jatyr. Bul jumystardy bıyl sáýirde aıaqtaý josparlanǵan. Jobamen 900 tekshe metr aýmaqqa beton quıylady.
- Búgin biz tarıhı sátke kýá bolyp otyrmyz. Negizgi nysannyń alǵashqy betony jazda quıylady. Al qazir onyń negizi bolatyn alańǵa beton tóselip jatyr, - dedi «Rosatom» memlekettik korporatsııasynyń dırektory Alekseı Lıhachev.
«Uzatom» agenttiginiń málimetinshe, eki shaǵyn jáne eki iri rektordan turatyn ıntegratsııalanǵan AES tolyq iske qosylǵanda jylyna 15,4 mlrd kVt/saǵat elektr energııasyn óndiredi. Bul eldiń jalpy tutyný kóleminiń 15 paıyzyna teń.
- Búgin Ózbekstannyń bolashaǵy úshin aıtýly kún. Biz zamanaýı atom energetıkasyn damytý baǵytyndaǵy ulttyq baǵdarlamany iske asyrý jolynda sheshýshi qadam jasadyq. Jızaq oblysyndaǵy qurylys alańynda RITM-200N reaktorlary ornalasatyn alańda alǵashqy beton quıý jumystary saltanatty túrde bastaldy. Bul joba Ózbekstan prezıdenti Shavkat Mırzıeevtiń qoldaýymen júzege asyrylyp jatyr. Memleket basshysy atom salasynyń damýyn jeke baqylaýda ustaıdy. Biz standarttardy qatań saqtap, ketsege saı jumystardy oryndaýǵa nıettimiz, - dedi BAQ ókilderiniń saýalyna jaýap bergen «Uzatom» agenttiginiń dırektory Azım Ahmedhadjaev.
Qosa ketsek, bıyl MAGATE ókilderi AES qurylysynyń barysyn baqylaý úshin Ózbekstanǵa barady.
Eske salaıyq, taıaýda Belarýs prezıdenti Ózbekstannyń AES salý jobasyn iske asyrýda strategııalyq seriktes bolýǵa daıyn ekenin málimdedi.
Buǵan deıin habarlaǵanymyzdaı, Ózbekstanda salynyp jatqan AES Jızaq, Samarqand jáne Naýaı oblystaryn elektr energııasymen qamtamasyz etpek.
Sondaı-aq, taıaýda Ózbekstanda atom elektr stantsııasy qurylysynyń birinshi kezeńi bastalǵanyn jazyp edik.
23 jeltoqsanda Ózbekstanda AES qurylysy boıynsha qoǵamdyq tyńdaý ótti.
