Ózbekstanda bolǵan jer silkinisi 13 adamnyń ómirin qıdy
TAShKENT. 20 shilde. QazAqparat /Qurmat Samarhan/ - Ózbekstanda bolǵan jer silkinisinen 13 adam qaza tapty, dep habarlanǵan «ÝzA» memlekettik aqparat agenttiginiń aqparattyq habarlamasynda.
Habarlamada aıtylǵandaı, «Tashkent» seısmıkalyq stansasynyń málimetinshe, 2011 jyldyń 20 shildesi kúni túngi saǵat 00.35-te respýblıka aýmaǵynda jer silkindi, jer silkinisiniń epıortalyǵy Qyrǵyzstan Respýblıkasynyń aýmaǵy boıynsha ońtústik-shyǵys baǵytynan 235 shaqyrym jerde ornalasqan, al jer dúmpýiniń kúshi 6,5-7,0 baldy quraǵan.
Jer silkinisiniń kúshi Ándijan jáne Ferǵana oblystarynda 5 balǵa, Namanǵan oblysynda 4 balǵa, Tashkentte 5 balǵa jetken.
Ózbekstan Respýblıkasy Tótenshe jaǵdaılar mınıstrlginiń aqparatyna súıensek, Ferǵana oblysyndaǵy Rıshtan, Baǵdat jáne Ózbekstan aýdandaryndaǵy jer silkinisi kezinde birqatar turǵyn úıler zardap shekken. Sonyń saldarynan 13 adam qaza taýyp, 86 adamǵa alǵashqy medıtsınalyq kómek kórsetildi, onyń ishinde 35 adamdy aýrýhanaǵa jatqyzý qajettiligi týyndaǵan.
Ózbekstan Respýblıkasynyń Prezıdenti Islam Kárimovtiń tapsyrmasy boıynsha respýblıkanyń Úkimeti tótenshe jaǵdaıdyń saldaryn joıý boıynsha jáne zardap shekkenderge jan-jaqty kómek kórsetý boıynsha jedel sharalardy qolǵa alýda.
El basshylyǵy jer silkinisinen qaza tapqandardyń otbasy múshelerine jáne jaqyndaryna kóńil aıtady.
