Ózbekstanda besem dúnıege keldi
TAShKENT. KAZINFORM — 6 shildede Ózbekstannyń Ándijan qalasyndaǵy № 2 perzenthanada besem dúnıege keldi, dep habarlaıdy Kazinform agenttiginiń Tashkenttegi menshikti tilshisi.
Densaýlyq saqtaý mınıstrliginiń málimetinshe, keshe Ándijan qalasyndaǵy «Qaıraǵochtosh» mahallasynyń turǵyny Nargız Bekjonova perzenthanaǵa jatqyzylyp, oǵan kesir tiligi jasaldy.
Bosaný bilikti akýsher-gınekolog, neonatolog jáne reanımatologtardyń baqylaýymen sátti ótti. Sábılerdiń úsheýi — qyz, ekeýi — ul.
Keıin ana men sábıler Ana men bala densaýlyǵyn qorǵaý respýblıkalyq mamandandyrylǵan ǵylymı-praktıkalyq medıtsınalyq ortalyǵynyń Ándijan oblystyq fılıalyna aýystyryldy.
— Qazirgi ýaqytta sábıler men anasynyń densaýlyǵy jaqsy. Olar bilikti medıtsına qyzmetkerleriniń baqylaýynda, — delingen vedomstvonyń baspasóz qyzmeti taratqan habarlamada.
Eske salaıyq, taıaýda Qytaıdyń Ýhan qalasyndaǵy perzenthanalardyń birinde 24 jastaǵy Dılhýmar Mámetjan ómirge besem ákelgenin jazyp edik.
Buǵan deıin habarlaǵanymyzdaı, byltyr Tashkentte tórtem dúnıege keldi.
