Ózbekstanda barlyq buqaralyq is-sharalarǵa tyıym salyndy

TAShKENT. QazAqparat – Ózbekstanda epıdemıologııalyq jaǵdaıdyń nasharlaýyna baılanysty barlyq buqaralyq is-sharalar ýaqytsha toqtatylady, dep habarlaıdy QazAqparat tilshisi.

Tıisti sheshim jaqynda koronavırýsqa qarsy is-qımyl jónindegi arnaıy respýblıkalyq komıssııada qabyldandy.

«Munda barlyq merekelik buqaralyq is-sharalar, sporttyq sharalar sondaı-aq kontsertter, festıvalder, teatr jáne kınokórsetilimder týraly aıtylyp otyr. Sharanyń qaı jerde ótetini – ashyq alańda nemese jabyq ǵımaratta uıymdastyrylýy mańyzdy emes, bárine shekteý qoıylady. Al sporttyq jarystardy jankúıerlersiz ótkizýge bolady», - delingen habarlamada.

Sonymen birge, 1 tamyzdan bastap Ózbekstan aýmaǵynda toı, jerleý jáne basqa da otbasylyq sharalar ótkizýdegi sanıtarlyq-gıgıenalyq erejelerdiń saqtalýyn baqylaý kúsheıtiledi jáne oǵan qatysýshylar sany 50 adamǵa deıin shekteledi.

Ózbekstannyń densaýlyq saqtaý mınıstrliginiń málimetinshe, bul tyıymdar koronavırýs boıynsha sanıtarlyq-epıdemıologııalyq jaǵdaı jaqsarǵansha kúshinde bolady.

Eske sala keteıik, 28 maýsymnan bastap Ózbekstanda epıdemıologııalyq jaǵdaıdyń ýshyǵýyna baılanysty karantındik talaptar kúsheıtildi.

Ózbekstan astanasy eki aptalyq karantınge jabyldy.

Tashkenttegi tósek qoryn keńeıtý úshin 2 myń oryndyq rezervi bar kovıdtik ortalyqtar ashyldy.