Ózbekstanda balaǵa qatysty jasalǵan turmystyq zorlyq-zombylyq úshin jaza engizildi

TAShKENT. KAZINFORM – Ózbekstanda balalarǵa qatysty jasalǵan turmystyq zorlyq-zombylyq úshin jaza engizildi. Ákimshilik jáne Qylmystyq kodeksterge tıisti ózgeris engizýdi kózdeıtin zańǵa keshe el prezıdenti Shavkat Mırzıeev qol qoıdy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Tıisti túzetýge sáıkes, Ózbekstannyń Ákimshilik jáne Qylmystyq kodeksteriniń turmystyq zorlyq-zombylyq týraly baptarymen qorǵalatyn tulǵalar tobyna balalar engizildi.

Bul rette eger búldirshin fızıkalyq qysym kóretin bolsa ǵana kúdiktiniń ústinen atalǵan baptar boıynsha is qozǵalatynyn eskergen jón.

Sonymen qatar, Ózbekstannyń Qylmystyq is júrgizý kodeksi de jańa baptarmen tolyqty. Atap aıtqanda, endi turmystyq zorlyq-zombylyqqa baılanysty isterde taraptardyń tatýlasý týraly ótinishi tek sot talqylaýy satysynda beriledi.

Buǵan deıin Ózbekstanda medıatsııa boıynsha ótinishti isti aldyn ala tergeý kezeńinde joldaýǵa bolatyn.