Ózbekstanda bala zorlaǵandar ómir boıyna bas bostandyǵynan aıyrylýy múmkin
ASTANA. KAZINFORM — Ózbekstanda balalarǵa qarsy jasalatyn qylmystar úshin, sonyń ishinde 14 jasqa tolmaǵandarǵa qatysty jynystyq zorlyq-zombylyq áreketteri úshin jazalaý sharalary qatańdatyldy.
Endi 14 jasqa tolmaǵan balany zorlaǵany úshin qylmysker 25 jylǵa deıin bas bostandyǵynan aıyrylýy nemese ómir boıyna túrmege qamalýy múmkin.
Tıisti zańǵa Ózbekstan prezıdenti Shavkat Mırzıeev qol qoıdy.
— Balaǵa zııan keltirip, janyna jara salǵan árbir adam jazasyn alady. Bul talap bilim berý mekemeleriniń qyzmetkerlerine de, zorlyq-zombylyq jasaǵan týǵan-týystaryna da birdeı qoldanylady. Balanyń ólimine ákep soqqan qandaı da bir qylmys úshin jazany jeńildetýge jol berilmeıdi, — dep jazdy Ózbekstan Prezıdenti Ákimshiliginiń basshysy Saıda Mırzıeeva.
Saıda Mırzıeeva mundaı qylmystar úshin jaýapqa tartýǵa eshqandaı merzimdik shekteý qoıylmaıtynyn da málimdedi. Buǵan deıin 14 jasqa tolmaǵan balany zorlaǵandarǵa 15 jyldan 20 jylǵa deıin túrme jazasy taǵaıyndalatyn.
Buǵan deıin Petropavlda 13 jastaǵy qyzdy zorlaǵan erli-zaıyptyǵa sot úkimi shyqqany habarlaǵan edik.
