Ózbekstanda bakalavrıat pen magıstratýraǵa beriletin grant sany ulǵaıtylady

ASTANA. KAZINFORM – Jańa oqý jylynda bakalavrıatqa 35 500, magıstratýraǵa 9 922 memlekettik grant bólinedi, dep habarlaıdy Ózbekstan Ádilet mınıstrliginiń resmı Telegram-arnasy. 

Bıylǵy jáne aldaǵy 3 oqý jylyna memlekettik joǵary oqý oryndaryna grant negizinde qabyldaý parametrleri bekitildi.

Prezıdent jarlyǵyna sáıkes, 2025/2026 oqý jylyna bakalavrıatqa (kúndizgi bólimge) 35 500 grant bólinedi (ótken jyly 34 838 grant bólindi).

Kelesi kezeńderdegi granttar sany tómendegideı:

2026/2027 oqý jylyna – 36 023;

2027/2028 oqý jylyna – 36 460;

2028/2029 oqý jylyna 36 761.

Jańa oqý jylynda magıstratýranyń kúndizgi bólimine 9 922 granttyq oryn bólinedi (ótken jyly 9 365 oryn bólingen). Bul rette memlekettik bıýdjet esebinen 2026/2027 oqý jylynda 10 191 stýdent, 2027/2028 oqý jylynda 10 477 stýdent magıstratýrada oqı alady. 2028/2029 oqý jylynda talapkerlerge 10 784 grant beriledi.

Sondaı-aq úkimet sheteldik jáne memlekettik emes ýnıversıtetterge 1320, sheteldegi ózbek jastaryna 30, áıelderge 4000 grant bóledi.

Qabyldaý parametrlerin bólý aımaqtar men salalardyń qajettilikterine sáıkes anyqtalady. Jeńildikterge ıe úmitkerler úshin qosymsha parametrler eskeriledi. Sonymen qatar belgili bir salalardyń (til, óner, sport t.b.) erekshelikteri eskeriledi.

Ózbekstanda memlekettik grant burynǵydaı tórt jylda bir stýdentke emes, jyl saıyn joǵary ball jınaǵan stýdentterge qaıta bólinedi.

Eske sala keteıik, Ózbekstan halqynyń sany 38 mıllıonǵa jýyqtady.