Ózbekstanda ajyrasý kóbeıip, otbasyn qurǵandar qatary azaıdy

TAShKENT. KAZINFORM – Bıyl alǵashqy úsh aıda Ózbekstanda 42,3 myń jup otbasyn qurdy, ótken jyldyń sáıkes kezeńimen salystyrǵanda tirkelgen nekeler sany 1,5 myńǵa az, dep habarlaıdy Kazinform agenttiginiń Tashkenttegi menshikti tilshisi.

Sonymen birge elde ajyrasý kóbeıdi. Atap aıtqanda, 2026 jyldyń birinshi toqsanynda 12,7 myń otbasynyń shańyraǵy shaıqaldy. Byltyrmen salystyrǵanda bıyl ajyrasý derekteri 1,2 myńǵa kóp.

Ulttyq statıstıka komıtetiniń málimetinshe, 42,3 myń nekeniń 20,2 myńy (47,7%) qalalarda, al 22,1 myńy (52,3%) aýyldyq jerlerde tirkelgen.

Buǵan deıin habarlaǵanymyzdaı, Ózbekstanda otasqanyna bir jyl tolmaǵan erli-zaıyptylardyń ajyrasýyna shekteý engizilmek.

Eske salaıyq, byltyr Ózbekstanda týý kórsetkishi tómendedi. Sondaı-aq, 2025 jyly Ózbekstanda jeńgetaılyqpen aınalysqan 2 myńnan astam adam jazalandy.