Ózbekstanda azamattardyń jeke derekterin zańsyz jarııalaý faktileri jıiledi

TAShKENT. KAZINFORM – Keıingi jyldary Ózbekstanda azamattardyń jeke derekterin zańsyz jarııalaý faktileri jıiledi, dep habarlaıdy Kazinform agenttiginiń menshikti tilshisi.

Ádilet mınıstrliginiń málimetinshe, keıingi 3 jylda ózbekstandyqtardyń derbes derekterin zańsyz taratý, jarııalaý sııaqty ákimshilik isterdiń sany - 2,5 ese, al qylmystyq ister shamamen 40%-ǵa ósken.

Vedomstvonyń baspasóz hatshysy Haet Kılıchevtiń atap ótýinshe, Ózbekstan zańnamasyna sáıkes, foto nemese vıdeoǵa azamattyń tikeleı kelisimi negizinde ǵana túsirýge bolady. Al kámeletke tolmaǵandarǵa qatysty materıaldardy jarııalaý úshin olardyń ata-anasy ruqsat berýi tıis.

Degenmen atalǵan ereje talap etilmeıtin jaǵdaılar bolady. Máselen, kontsert nemese mıtıngilerde foto jáne vıdeoǵa túsirý úshin ruqsat qajet emes. Sonymen qatar qandaı da bir azamat izdeýde júrse, onda onyń sýreti men jeke derekterin jarııalaý úshin kelisim suralmaıdy.

Qosa ketsek, endi deportatsııalanǵan ózbekstandyq mıgranttar elge qaıtý shyǵynyn óz qaltasynan óteýge mindetteledi.