Ózbekstanda avtomobıl áskerı júk kóligimen soqtyǵysyp, úsh adam qaza tapty
ASTANA. QazAqparat - Búgin tańerteń Ózbekstanda jeńil avtomobıl áskerı júk kóligimen soqtyǵysyp, saldarynan úsh adam qaza tapty, dep habarlaıdy «QazAqparat» HAA Ózbekstan Qorǵanys mınıstrliginiń baspasóz qyzmetine silteme jasap.
Jol apaty áskerı kólikter kolonnasy josparly áskerı daıyndyq ótkizetin aımaqqa bara jatqanda, Shahrısabz - Qarshy avtojolynda boldy.
«Inspektorlar qozǵalysty toqtatýǵa belgi bergenine qaramastan, «70 U 110 MA» nómirli «Lasettı» avtomobıli muny eskermegen. Sonyń saldarynan ol «ZIL-131» markaly júk kóligimen soqtyǵysty. Úsh adam - jeńil kóliktiń júrgizýshisi men eki jolaýshy qaza tapty. Jeńil kóliktiń taǵy bir jolaýshysy jaraqat alǵan», - delingen habarlamada.
Zardap shekken jolaýshyǵa medıtsınalyq kómek kórsetilgen, qazir onyń ómirine tóngen qaýip joq.
