Ózbekstanda avtobýs jolaǵyna túsken kólik júrgizýshilerine aıyppul salynbaq

TAShKENT. KAZINFORM – Ózbekstanda avtobýs pen arnaıy tehnıkaǵa arnalǵan jolaqpen júrgen kólik júrgizýshilerine aıyppul salý josparlanyp otyr, dep habarlaıdy Kazinform agenttiginiń menshikti tilshisi.

Olıı Majlıstiń Zań shyǵarý palatasynan málim etkendeı, jaýapty komıtet qoǵamdyq kólikti paıdalaný tıimdiligin arttyrýǵa baǵyttalǵan jańa zań jobasyn ázirlep jatyr.

Atap aıtqanda, Ózbekstannyń Ákimshilik jaýapkershilik týraly kodeksine qoǵamdyq kólik úshin bólingen arnaıy jolaqqa túsken júrgizýshilerge aıyppul salýdy kózdeıtin bap engizý usynyldy.

Oǵan saı, birinshi ret jasalǵan quqyq buzýshylyq úshin 3 bazalyq eseptik shama (shamamen 47 myń teńge) mólsherinde aıyppul salynsa, qaıtalanǵan jaǵdaıda júrgizýshiler 5 bazalyq eseptik shama (71 myń teńge) kóleminde aıyppul arqalaıdy.

Aıta keteıik, Qazaqstannyń Ákimshilik quqyq buzýshylyq Kodeksiniń 601 babyna saı, belgilenbegen jerden avtobýs jolaǵyna túsken júrgizýshilerge 3 AEK (11 076 teńge) mólsherinde aıyppul salynady. Eger bir jyl ishinde osyndaı áreket qaıtalanatyn bolsa, onda erejeni saqtamaǵan azamat 10 AEK (36 920 teńge) tóleýi tıis.