Ózbekstanda Aýǵanstan altynyn óńdeý bastaldy
ASTANA. KAZINFORM —Termız halyqaralyq saýda ortalyǵynyń erkin saýda aımaǵyndaǵy zergerlik buıymdar óndirýge mamandanǵan Termiz Gold Production LLC kásipornynda Aýǵanstannan ımporttalǵan altyn shıkizatyn óńdeý bastaldy, dep habarlaıdy ÓzA.
Osyǵan baılanysty Surhandarııa oblystyq keden basqarmasynyń basshysy I.Ǵýlomov kásiporyn basshylarymen jáne Aýǵanstan altyn óndirý kásipornynyń ókilderimen kezdesip, shıkizatty kedendik óńdeý rejımine ornalastyrý jáne onyń artyqshylyqtary týraly pikir almasty.
Sondaı-aq, bul aımaqtyq ónerkásiptik áleýetti arttyrýda, zergerlik ónerkásibin damytýda jáne eksport kólemin arttyrýda mańyzdy ról atqaratyny atap ótildi.
Oblystyq keden basqarmasynyń baspasóz qyzmetiniń málimetinshe, oblys ákimshiligi men Keden komıteti basshylyǵynyń bastamasymen júzege asyrylǵan joba buryn Aýǵanstannan basqa elderge tranzıtpen tasymaldanǵan altyn shıkizatyn Surhandarııa oblysynyń keden aýmaǵynda óńdeý rejıminde óńdeýge, jartylaı óńdelgen zergerlik buıymdardy shyǵarýǵa jáne olardy joǵary qosylǵan quny bar ónim retinde eksporttaýǵa qolaıly jaǵdaı jasady. Bul sondaı-aq oazıstiń ınvestıtsııalyq tartymdylyǵyn arttyrýǵa, kedendik rásimderdi jeńildetýge jáne aımaqta joǵary qosylǵan qun jasaýǵa qyzmet etedi.
Jobanyń bastapqy kezeńinde 2,9 mıllıon dollarǵa baǵalanǵan 20 kılogramm altyn shıkizaty óńdeýge jiberildi.
Eske sala keteıik, bıyl Ózbekstan ekonomıkasy 6 paıyzǵa ósedi.