Ózbekstanda Auezov University fılıaly ashylady

Ózbekstannyń Shyrshyq qalasynda Muhtar Áýezov atyndaǵy Ońtústik Qazaqstan ýnıversıtetiniń fılıaly ashylady, dep habarlaıdy Kazinform.

Bul Memleket basshysy Qasym-Jomart Toqaev pen Ózbekstan prezıdenti Shavkat Mırzıeevtiń ózara kelissózderiniń qorytyndylary negizindegi ýaǵdalastyq boıynsha jáne Auezov University 80 jyldyǵyna oraı júzege asyrylyp otyr. 

Eki el basshylary kelissózderiniń nátıjesi boıynsha arnaıy Jol kartasy ázirlenip, tıisti jumystar qolǵa alyndy. Oǵan sáıkes qos memlekettiń vedomstvolyq mınıstrlikteri deńgeıinde Ózbekstannyń Shyrshyq qalasynda Muhtar Áýezov atyndaǵy OQÝ-dyń fılıalyn ashý týrasynda úshjaqty kelisimge qol qoıyldy.

Auezov University atalǵan fılıalda 18 bilim berý baǵdarlamasy boıynsha stýdentter oqytýdy júzege asyrady. 

– Shyrshyq – Ózbekstannyń ónerkásibi órkendegen qalalarynyń biri. Óńirde mashına jasaý, metall óńdeý jáne hımııa ónerkásibi salalary qarqyndy damyǵan. Osyndaı tendentsııalardy eskere otyryp, Auezov University óńirge qajetti bilim berý baǵdarlamalary boıynsha kadrlar daıarlaýdy qolǵa almaq, – dep atap ótti M.Áýezov atyndaǵy OQÝ Basqarma tóraǵasy, rektor Darııa Qojamjarova.