Ózbekstanda aýa sapasy nasharlaǵanda kásiporyndardyń jumys ýaqyty shektelmek
TAShKENT. KAZINFORM – Ózbekstan Olıı Májilisiniń Senaty qorshaǵan ortaǵa zııandy áser etetin kásiporyndardyń jumysyn shekteý jáne olardy toqtata turý shartyn naqtylaıtyn túzetýlerdi maquldady, dep habarlaıdy Kazinform agenttiginiń menshikti tilshisi.
Senatorlardyń pikirinshe, qurylys, óndiris jáne ýrbanızatsııa aýqymynyń keńeıýi qorshaǵan ortaǵa bólinetin zııandy shyǵaryndylar kóleminiń artýyna sebep bolyp otyr.
Jańa ózgeriske saı, tótenshe jaǵdaı, epıdemııa jáne halyqtyń ómiri men densaýlyǵyna ózge de qaýip tóndirmes úshin qorshaǵan ortaǵa zııandy shyǵaryndylar bóletin obektilerdiń qyzmetin 10 kúninen aspaıtyn merzimge shekteý jáne toqtatý múmkin bolady.
Ózbekstan Senatynyń tóraǵasy Tanzıla Narbaeva tabıǵatty qorǵaý jáne ózge de zańnamalarda maǵynasyn burmalap, basqa maqsattarǵa qoldanatyndaı normalar bolmaýy tıis ekenin aıtty.
«Іs júzinde bul túrli másele, túsinispeýshilik, narazylyq jáne eń qorqynyshtysy sybaılas jemqorlyq jaǵdaılaryn týdyrýy múmkin. Osy turǵydan alǵanda, qabyldanyp otyrǵan túzetýler óte mańyzdy. Sebebi bizdiń elimizde ındýstrııalandyrý deńgeıi jyl saıyn artyp keledi. Bul rette ekologııaǵa áser etý aýqymy da keńeıedi. Ásirese, mundaı naqty quqyqtyq normalar Tashkent sııaqty iri qalamyzdaǵy aýanyń shamadan tys lastanýyna jol bermeý úshin úlken mańyzǵa ıe», - dedi Tanzıla Narbaeva.
Qosa ketsek, buǵan deıin ekologııalyq ahýaldy jaqsartý úshin Ózbekstan astanasynda avtokólikterge qatysty birqatar shekteý engizý usynylǵanyn jazyp edik. Atap aıtqanda, AI-80 janarmaıyn paıdalanýǵa tyıym salý, 2010 jylǵa deıin shyǵarylǵan barlyq avtokólik quraldarynyń qozǵalysyna shekteý qoıý jáne kómir men mazýtty paıdalanýdan bas tartý usynyldy.
