Ózbekstanda áskerı qoımada bolǵan jarylystan 3,7 myńnan astam ǵımarat zaqymdandy
TAShKENT. QazAqparat – Ózbekstannyń Syrdarııa aımaǵynda ornalasqan áskerı qoımadaǵy jarylystan 3,7 myńnan astam ǵımarat túrli deńgeıde zaqymdandy, dep habarlaıdy QazAqparat menshikti tilshisi oblystyq ákimdiktiń baspasóz qyzmetine silteme jasaı otyryp.
Baspasóz qyzmeti taratqan málimetke sáıkes, keltirilgen shyǵyndy anyqtaý jáne joıý maqsatynda tıisti sala mınıstrlikteri men jergilikti bılik ókilderinen jumys toby quryldy.
«Áskerı bólim janynda ornalasqan kvartaldar tolyǵymen tekserildi. Nátıjesinde 3 742 turǵyn jaı men basqa da ǵımarattyń shatyry, qorshaýy, terezeleri men esikteri ishinara zaqymdanǵany anyqtaldy», - dep málim etti aımaq ákimdigi.
Buǵan deıin habarlanǵanyndaı, Ózbekstannyń Syrdarııa oblysyndaǵy áskerı qoımada jarylys boldy.
Ózbekstanda bolǵan jarylys dúmpýi Maqtaaral aýdanynda estildi.
Jarylystan 16 adam zardap shekti.
