Ózbekstanda áskerı qyzmetshilerdiń kazıno oınaýyna tyıym salyndy

TAShKENT. KAZINFORM – Ózbekstan prezıdenti Shavkat Mırzıeev Qarýly kúshter men quqyq qorǵaý organdary qyzmetkerleriniń jaýyngerlik ázirligi men tıimdiligin arttyrýǵa baǵyttalǵan zańǵa qol qoıdy, dep habarlaıdy Kazinform agenttiginiń menshikti tilshisi.

Qujatqa saı, áskerı qyzmetshilerge jáne quqyq qorǵaý organdarynyń mamandaryna kásipkerlikpen aınalysýǵa, áldekimniń múddesine qyzmet etip, ol úshin syıaqy nemese syılyq alýyna tyıym salynady.

Sonymen qatar, olardyń qumar oıyn oınaýyna, shetel azamattyǵyn jáne ýaqytsha turý yqtııarhatyn alý úshin ótinish berýine shekteý qoıylady.

Atalǵan zań 2025 jyldyń qańtarynan bastap kúshine enedi.

Eske salaıyq, bıyl 16 qyrkúıekte Prezıdent Qasym-Jomart Toqaev áskerı qyzmetshilerdiń mindetteri men olardyń baǵynýy tıis tártipterine ózgeris engizdi. Oǵan sáıkes, qazaqstandyq áskerılerdiń qumar oıyn oınaýyna tyıym salyndy.