Ózbekstanda áskerı boryshyn ótep júrgen sarbazdarǵa JOO-da qashyqtan oqý múmkindigi usynylmaq
TAShKENT. KAZINFORM — Ózbekstan prezıdenti Shavkat Mırzıeev eldiń qorǵanys qabiletin nyǵaıtý jáne áskerı qyzmetshilerdi qoldaý máseleleri boıynsha keńes ótkizdi, dep habarlaıdy Kazinform agenttiginiń Tashkenttegi menshikti tilshisi.
Jınalysta málim bolǵandaı, 2026-2027 oqý jylynan bastap merzimdi áskerı qyzmettegi sarbazdar úshin birqatar jeńildik engiziledi. Olarǵa joǵary oqý oryndaryna túsýge jáne Otan aldyndaǵy boryshyn óteý barysynda qashyqtan bilim alýǵa múmkindik beriledi. Ol úshin áskerı bólimderde daıyndyq kýrstary uıymdastyrylady.
Sondaı-aq, aqyly negizinde oqıtyn sarbazdarǵa paıyzsyz nesıe usynylady. Ýnıversıtetterge túskender áskerı kafedra stýdentterimen teńestirilip, oqýyn támamdaǵannan keıin «zapastaǵy leıtenant» áskerı ataǵyn alady.
Al erekshe kózge túsken sarbazdar, ıaǵnı túrli saıystar men olımpıadalarda júldeli orynǵa ıe bolǵan jastar joǵary oqý oryndaryna emtıhansyz qabyldanady.
Eske salaıyq, 4 naýryzda Ózbekstan prezıdenti jaýapty mınıstrlikke eldiń qorǵanys áleýetin nyǵaıtýdy tapsyrǵan edi.
Buǵan deıin habarlaǵanymyzdaı, Ózbekstanda endi sheteldegi qarýly qaqtyǵystardy jarnamalaǵandar jaýapqa tartylady.
