Ózbekstanda asyl tuqymdy mal ımporttaýshylar 2029 jylǵa deıin salyqtan bosatylady
TAShKENT. KAZINFORM — Ózbekstan prezıdenti Shavkat Mırzıeev azyq-túlik qaýipsizdigi jáne mal sharýashylyǵyn qoldaý sharalaryn jetildirý boıynsha keńes ótkizdi, dep habarlaıdy Kazinform agenttiginiń Tashkenttegi menshikti tilshisi.
Ózbekstan 2030 jylǵa qaraı azyq-túlik eksportyn 10 mlrd dollarǵa deıin jetkizýge nıetti. Ol úshin salany halyqaralyq standartqa sáıkestendirý jumysy júrgizilmek.
Sonymen birge belsendi fermerlerdiń reıtıngisin jasaqtaý josparlanǵan. Onyń aıasynda 2027 jyldyń 1 naýryzyna deıin azyq-túlik qaýipsizdigi boıynsha biryńǵaı avtomattandyrylǵan aqparattyq platforma iske qosylady. Ol eksporttaýshylardy artyq qaǵazbastylyqtan aryltyp, shekara beketterinen «Bir tereze» qaǵıdasymen ótýge jaǵdaı jasaıdy.
Buǵan qosa keńeste mal sharýashylyǵyn damytý máseleleri de qaraldy. Kórshiles elde 16 mln gektar jaıylym jer bar, degenmen búginde onyń 10 paıyzy ǵana paıdalanylyp otyr.
Osyǵan baılanysty Aýyl sharýashylyǵy mınıstrligine qarasty Mal sharýashylyǵy jáne jaıylymdardy damytý agenttigi qurylady. Vedomstvo aldyna iri qara mal basyn 16,5 mıllıonǵa, qoı men eshkini 30 mıllıonǵa jetkizý mindeti qoıyldy.
Tıisinshe, 1 maýsymnan bastap kommertsııalyq bankter sharýalarǵa jyldyq 10 paıyzben 10 jylǵa deıin nesıe beredi. Al asyl tuqymdy mal ımporttaýshylar 2029 jylǵa deıin qosylǵan qun salyǵynan bosatylady.
Eske salaıyq, Ózbekstan iri qara mal ósirý úshin Belarýsten jerdi jalǵa alady.
Buǵan deıin habarlaǵanymyzdaı, áýe kemesimen elge et tasymaldaıtyn ózbekstandyq kompanııalardyń 50% shyǵyny endi memleket esebinen óteledi.
Sondaı-aq, Ózbekstan 2027 jylǵa deıin Mońǵolııadan 100 myń bas usaq mal satyp alýǵa nıetti.
