Ózbekstanda Aral tabanynyń 2 mln gektardan astamy kógaldandyrylyp jatyr
ASTANA. KAZINFORM – Ekologııalyq sammıt ókili Azız Nurbekov Aral teńiziniń ekojúıesin qalpyna keltirýde Qazaqstan men Ózbekstan arasyndaǵy yntymaqtastyqtyń mańyzy zor ekenin aıtty.
Onyń aıtýynsha, Ózbekstanda Aral teńiziniń qurǵaǵan tabanyn kógaldandyrýǵa baǵyttalǵan aýqymdy baǵdarlama júzege asyrylyp jatyr. Qazirgi tańda 2 mln gektardan astam aýmaqta orman alqaptaryn qalyptastyrý josparlanǵan.
– Búginde Araldyń qurǵaǵan tabanynda jasyl jelek otyrǵyzý jumystary qarqyn alyp jatyr. Bul – óńirdegi ekologııalyq ahýaldy jaqsartýǵa baǵyttalǵan mańyzdy qadam, - dedi Azız Nurbekov.
Ol ekologııalyq sammıttiń Ortalyq Azııa elderi úshin tájirıbe almasýdyń tıimdi alańyna aınalǵanyn atap ótti. Onyń pikirinshe, Ózbekstan qurǵaq aımaqtarda orman ósirý tájirıbesimen bólise alady, al Qazaqstan Aral teńiziniń óz bóligin qalpyna keltirý baǵytyndaǵy tájirıbesin usyna alady.
– Biz tájirıbe almasýdy kúsheıtýimiz qajet. Ózbekstan – Araldyń qurǵaǵan tabanynda orman ósirý boıynsha, Qazaqstan – teńizdiń qazaqstandyq bóliginiń ekojúıesin qalpyna keltirý baǵytynda, - dedi ol.
Azız Nurbekov mundaı ekologııalyq sammıtter óńirdegi ózekti máselelerdi talqylap qana qoımaı, olardy birlesip sheshýdiń naqty joldaryn aıqyndaýǵa múmkindik beretinin aıtty.
Aıta keteıik, elordadaǵy RES 2026 halyqaralyq ekologııalyq sammıtine qatysý úshin birqatar memleket basshysy men úkimet ókilderi Qazaqstanǵa keldi.
