Ózbekstanda Aqtóbe oblysynyń kúnderi ótedi
AQTÓBE. QazAqparat - Ózbekstannyń Nókis qalasynda Aqtóbe oblysynyń kúnderi ótedi. Aýyl sharýashylyǵy jármeńkesi men mádenı-tanymdyq shara kúz aılaryna josparlanǵan, dep habarlaıdy QazAqparat tilshisi.
Aqtóbe turǵyndary kórshi elderdegi qala, oblys ortalyqtaryna jıi shyǵyp, aýyl sharýashylyǵy jármeńkesin uıymdastyrady. Máselen, Reseıdiń Orynbor, Orsk qalalaryna bardy. Bıyl Ózbekstan, onyń ishinde Qaraqalpaqstannyń Nókis qalasyna jol túsip tur. Aqtóbelik kásipkerler óz ónimderin tanystyryp, ózara yntymaqtastyq kelisimsharttaryna qol qoıady dep josparlanǵan.
«Bıyl oblys ákimi Berdibek Saparbaevtyń tapsyrmasymen Ózbekstan, onyń ishinde Qaraqalpaqstan Respýblıkasynyń Nókis qalasyna baramyz. Onda aýyl sharýashylyǵy jármeńkesi uıymdastyrylady. Óner adamdary ulttyq án men bıden kontsert qoıady. Al kásipkerler taýar aınalymyn arttyrý úshin seriktes izdeıdi. Eki el arasyndaǵy qarym-qatynasty nyǵaıtýǵa arnalǵan shara kúz aılaryna josparlandy»,- dedi Aqtóbe oblystyq aýyl sharýashylyǵy basqarmasynyń basshysy Qusaıyn Sársenbaı.
Aıta keteıik, Aqtóbede óńiraralyq kooperatsııany damytý baǵytynda jumys júrip jatyr. Buǵan deıin habarlaǵanymyzdaı, ótken jyly Aqtóbe oblysy men ózge óńirler arasyndaǵy taýar aınalymy 16,4 mıllııard teńgege jetti.
