Ózbekstanda AES salý úshin halyqaralyq konsortsıým qurylady

TAShKENT. KAZINFORM – Ózbekstanda salynatyn az qýatty atom elektr stantsııasynyń qurylysyna sheteldik kompanııalar da qatysady, dep habarlaıdy Kazinform agenttiginiń menshikti tilshisi. 

«O'zbekiston 24» telearanasyna suhbat bergen Azım Ahmedhadjaevtyń aıtýynsha, jobada Reseımen birge qytaılyq tehnologııalar jáne Eýropanyń tsıfrlyq baǵdarlamalary, apparattyq júıeleri paıdalanylady.

Sonymen qatar stantsııaǵa qajetti sýdyń kólemin azaıtý maqsatynda Majarstan nemese Qytaıda qurastyrylatyn «qurǵaq salqyndatý júıesin» qoldaný josparlanyp otyr.

- Biz ozyq tehnologııalardy qoldana otyryp, jobany tıimdi iske asyrýǵa múmkindik beretin halyqaralyq konsortsıým quramyz, - dedi Azım Ahmedhadjaev.

Foto: Ózbekstan prezıdentiniń baspasóz qyzmeti

Eske salaıyq, buǵan deıin Ózbekstan AES qurylysyna sheteldik kompanııalardy tartýǵa nıetti ekenin jazyp edik.

Ózbekstanda reseılik tehnologııa boıynsha óńirdegi alǵashqy az qýatty atom elektr stantsııasy salynady.

Árqaısysynyń qýaty 55 MVt bolatyn 6 reaktor (jalpy qýaty – 330 MVt) Djızak oblysyndaǵy Týzkan kólinde boı kóterdi. AES-tiń alǵashqy rekatory 2029 jyldyń sońynda iske qosylmaq. Al ol tolyq qýatta 2033 jyldan bastap jumys istemek.

Osyǵan saı, taıaýda Ózbekstan men Reseı AES salý kelisimshartynyń kúshine ený hattamasyna qol qoıdy.