Ózbekstanda AES qurylysy boıynsha qoǵamdyq tyńdaý ótip jatyr
TAShKENT. KAZINFORM — Ózbekstannyń Jızaq oblysyna qarasty Farısh aýdanynda AES salý usynysy boıynsha qoǵamdyq tyńdaý ótip jatyr, dep habarlaıdy Kazinform agenttiginiń menshikti tilshisi.
Halyq pikirin eskerýge baǵyttalǵan is-shara Bogdon eldi mekenindegi Mádenıet ortalyǵynda uıymdastyryldy. Oǵan Uzatom agenttiginiń basshylyǵy, oblys ákimdiginiń ókilderi, qoǵam belsendileri, ǵalymdar, ekologtar men sarapshylar qatysyp jatyr.
Qoǵamdyq tyńdaýda baıandama jasaǵan Atom energııasy jónindegi agenttiktiń bastyǵy Azım Ahmedhadjaev respýblıkada strategııalyq nysandy qurýdyń mańyzyna toqtaldy.
— Bizdiń maqsat — qoǵamdyq tyńdaýdy ashyq, ádil ári sapaly uıymdastyrý. Óıtkeni, mundaı iri jobany halyq pikirin nazarǵa almastan iske asyrý múmkin emes. AES eldiń elektr energııa óndirý áleýetin nyǵaıta túsedi. Bul nysan tolyq halyqaralyq standartqa saı salynady, tıisinshe barlyq qaýipsizdik talaptary saqtalady, — dep málim etti Uzatom agenttiginiń dırektory Azım Ahmedhadjaev.
Іs-shara barysynda sóz alǵan AES qurylysy dırektsııasy basshysynyń orynbasary Otabek Amanov Forısh aýdanynda monoqala salynatynyn málim etti.
— AES qurylysy júrip jatqan alańǵa jaqyn mańaıdan atomshylar qalashyǵy boı kóteredi. Onda kópqabatty úıler, mektep, balabaqsha, aýrýhana ornalasady. Prezıdentimiz bizge atalǵan monoqalany zamanaýı tehnologııalardy qoldana otyryp salýdy tapsyrdy. Tıisinshe, shaǵyn shahardyń turǵyndaryna barlyq jaǵdaı jasalady, — dedi Otabek Amanov.
Ózbekstanda boı kóteretin AES-tiń jalpy qýaty — 2110MVt. Ol jylyna 16-17 mlrd kVt elektr energııasyn óndiredi. Strategııalyq nysannyń qurylysy barysynda — 13 myń, al ol tolyq iske qosylǵanda 2 myń adam jumyspen qamtylmaq.
Eske salaıyq, Ózbekstanda salynyp jatqan AES Jızaq, Samarqand jáne Naýaı oblystaryn elektr energııasymen qamtamasyz etýge qaýqarly bolady.
Sondaı-aq, taıaýda Ózbekstanda atom elektr stantsııasy qurylysynyń birinshi kezeńi bastalǵanyn jazyp edik.
Buǵan deıin habarlaǵanymyzdaı, Reseı Ózbekstanda taǵy bir AES salady.
Qosa ketsek, jaqynda QR Atom energetıkasy jónindegi agenttik tóraǵasy Almasadam Sátqalıev elimizdegi tuńǵysh AES-tiń alǵashqy betony shamamen 2029 jyly quıylýy múmkin ekenin aıtty.