Ózbekstanda AES qurylysy boıynsha qoǵamdyq tyńdaý ótedi

TAShKENT. KAZINFORM – Taıaýda Ózbekstanda AES salý usynysy boıynsha qoǵamdyq tyńdaý ótedi. Bul týraly «Uzatom» agenttiginiń dırektory Azım Ahmedhadjaev málim etti, dep habarlaıdy Kazinform agenttiginiń menshikti tilshisi.

- Biz qoǵamdyq tyńdaý ótkizýge baǵyttalǵan baǵdarlama ázirledik jáne jaqyn arada ony iske asyrýǵa kirisemiz. Júrgizip jatqan jumystardy jurtshylyqqa jetkizý úshin sala mamandaryn jáne sheteldik sarapshylardy tartýdy josparlap otyrmyz. Qoǵamdyq pikirdi eskermeı, biz alǵa ilgerileı almaımyz, - dedi Máskeýde ótken «Dúnıejúzilik atom aptalyǵy» forýmyna qatysqan Azım Ahmedhadjaev.

Eske salaıyq, Reseı Ózbekstanda taǵy bir AES salady. Ol da Djızak oblysynyń aýmaǵynda ornalasady. Onyń qýaty 2000MVt bolmaq. Sonymen qatar, búginde Týzkan kólinde az qýatty stantsııanyń qurylysyna daıyndyq jumysy júrip jatyr.

Qosa ketsek, taıaýda Qazaqstan halqyna Joldaýyn jarııalaǵan Prezıdent Qasym-Jomart Toqaev elde birneshe AES salý bastamasyn kótergen bolatyn. Tıisinshe, 25 qyrkúıekte alǵashqy AES-ke úzdik ataý berý konkýrsy bastaldy.