Ózbekstanda Ádep kodeksin buzǵan 60-qa jýyq sýdıanyń ókilettigi merziminen buryn toqtatyldy

TAShKENT. KAZINFORM – Ózbekstan Joǵarǵy sýdıalar keńesiniń tóraǵasy Holmýmın Edgorov el prezıdenti Shavkat Mırzıeevke esep berdi, dep habarlaıdy Kazinform agenttiginiń menshikti tilshisi.

Jınalys barysynda málim bolǵandaı, byltyr 59 sýdıanyń ókilettigi merziminen buryn toqtatylǵan. Atap aıtqanda, 19 sýdıa Ádep kodeksiniń talaptaryn buzyp, qyzmetten bosatylsa, 3 sýdıa qylmystyq jaýapqa tartyldy. Sondaı-aq, 58 sýdıa qyzmetinen tómendetildi. Baǵalaý qorytyndysyna sáıkes, 33 sýdıa óz mindetin odan ári atqarýǵa laıyq emes dep tanylyp, 266 sýdıaǵa tártiptik jaza qoldanyldy.

Shavkat Mırzıeev tártiptik jaýapkershiliktiń oryndy qoldanylýyn qamtamasyz etý maqsatynda Sýdıalardyń tártiptik alqasyn qurýdy usyndy. Buǵan qosa jıynda sýdıalar men olardyń otbasy músheleriniń múlkin deklaratsııalaý júıesin engizý, sot apparattarynyń qyzmetkerlerin jumysqa qabyldaýdyń ashyqtyǵyn qamtamasyz etý bastamalary talqylandy.

Sonymen qatar, atalǵan saladaǵy genderlik teńdik máselesi de sóz boldy. Tıisinshe, Ózbekstan basshysy 10 naýryz - Halyqaralyq áıel-sýdıalar kúni merekesin atap ótý josparyna qoldaý bildirdi.

Qosa ketsek, byltyr Ózbekstanda 5 myńnan astam jemqorlyq qylmysy anyqtaldy.

Munymen birge, Ózbekstanda áleýmettik jelidegi beıádep sóz úshin ákimshilik jaza engiziledi. Sondaı-aq, Ózbekstanda endi sheteldegi qarýly qaqtyǵystardy jarnamalaǵandar jaýapqa tartylady.