Ózbekstanda 9 tonna palaý pisirildi

TAShKENT. KAZINFORM — Hıýadaǵy «Arda Hıýa» týrıstik kesheninde «Horezm palaýy» halyqaralyq aspazdyq festıvali ótti, dep habarlaıdy ÓzA. 

Halyqaralyq festıval oblys ákimshiligimen jáne onnan astam uıymmen birlesip uıymdastyryldy.

Hıýa qalasyndaǵy «Ǵovýk» kóliniń aınalasyndaǵy 24,5 gektar aýmaqta 250-den astam týrıstik nysandy qamtıtyn «Arda Hıýa» kesheni bıyl paıdalanýǵa berilgen. Keshen jyl saıyn bir jarym mıllıonnan astam jergilikti jáne sheteldik týrısterdi qabyldaıdy. Sonymen qatar týrısterdiń bos ýaqytyn maǵynaly uıymdastyrý maqsatynda jyl saıyn 10-nan astam halyqaralyq festıval jáne 20-dan astam jergilikti buqaralyq is-sharalar ótkiziledi. «Horezm palaýy» halyqaralyq aspazdyq festıvali solardyń biri.

«Arda Hıýa» týrıstik kesheninde ondaǵan myń sheteldik qonaqtar men jergilikti turǵyndar jınaldy.

Alańnyń arnaýly bóliginde, Ózbekstandaǵy jáne búkil álemdegi tanymal aspazdar elde alǵash ret rekordtyq 9 tonnalyq «Horezm palaýyn» daıyndady.

— Bul palaýǵa 2,5 tonna kúrish, 3 tonna et, 3 tonna sábiz, 700 lıtr maı, 100 keliden astam pııaz, odan da kóp meıiz jáne basqa da dámdeýishter paıdalanyldy. — deıdi Ózbekstan aspazdar odaǵynyń bas tehnology Tolıbjon Ýmaralıev. — Palaý úshin Horezmniń eń jaqsy kúrish sorttarynyń biri, «Alanga» sorty tańdaldy. Úlken kólemdi taǵam shaıhanada, úılený toılarynda nemese úıde daıyndalatyn ádettegi taǵamnan ózgeshe. Taǵam birneshe kún boıy daıyndaldy. Tipti ettiń astyna qoıylǵan jiliktiń salmaǵy 300 keli boldy. Palaý peshte ot jaǵylǵannan keıin on saǵat boıy pisirildi.

Festıval aıasynda qonaqtarǵa respýblıkanyń 70-ten astam sheber aspazdarynyń qatysýymen aspazdyq kórsetilimder men tikeleı mádenı baǵdarlamalar usynyldy.

Festıvalge Dúnıejúzilik aspazdar qoǵamy qaýymdastyǵy (WACS) da úlken qyzyǵýshylyq tanytty. Bul sondaı-aq Ózbekstandaǵy gastronomııalyq týrızmniń osy salasyna úlken kóńil bólinýine baılanysty.

Toǵyz tonna palaýdyń bir bóligi festıval qatysýshylaryna taratyldy.

Horezm palaýynyń kóp bóligi aımaqtaǵy az qamtylǵan, jetim balalarǵa jáne muqtaj otbasylarǵa, sondaı-aq «Sahovat» jáne «Mehrıbonlık» úılerine qaıyrymdylyq retinde taratyldy.

Eske sala keteıik, Samarqanda 7 tonna palaý pisiriletini jaıly jazǵan edik.