Ózbekstanda 84 eldiń delegatsııasy qatysatyn ınvestıtsııalyq forým ótedi

TAShKENT. KAZINFORM – Ózbekstan prezıdenti Shavkat Mırzıeev 2-3 mamyr aralyǵynda ótetin III Tashkent halyqaralyq ınvestıtsııalyq forýmyna daıyndyq barysymen tanysty, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ózbekstan basshysynyń baspasóz qyzmetinen málim etkendeı, 2022 jyly alǵash ret ótken bul forýmǵa 56 elden kelgen 1 myńnan astam sheteldik qonaq katysqan bolatyn.

Bıyl oǵan 84 memleketten 2500-ge jýyq delegat keledi dep kútilýde. Olardyń ishinde shet elderdiń úkimet músheleri, iri kompanııalardyń basshylary, sondaı-aq BUU, ShYU, OPEK, Eýropalyq qaıta qurý jáne damý banki sııaqty halyqaralyq uıymdardyń ókilderi bolady.

Baǵdarlamaǵa saı, forým aıasynda 40-tan astam shara, atap aıtqanda úkimetaralyq komıssııalardyń otyrysy jáne Ózbekstandaǵy birqatar jobany iske qosý rásimi ótedi.

Sonymen qatar, 3 mamyrda Ózbekstan prezıdenti janyndaǵy Sheteldik ınvestorlar keńesiniń ekinshi plenarlyq sessııasy ótedi.

Aıta keteıik, Tashkent halyqaralyq ınvestıtsııalyq forýmy Ózbekstannyń ekonomıkalyq múmkindigin kórsetip, sonyń negizinde ınvestıtsııalyq kelisimder jasaýǵa arnalǵan alań sanalady.