Ózbekstanda 8 aıda 3 myńǵa jýyq bala túrli qylmystyń qurbany boldy

ASTANA. KAZINFORM — 2025 jyldyń qańtar-tamyz aılarynda 2872 kámeletke tolmaǵan bala túrli qylmystardyń qurbany bolsa, onyń 1225-i (42,7%) — 12 jasqa deıingi balalar, dep habarlaıdy Gazeta.uz. 

Bul týraly Ózbekstan Ulttyq áleýmettik qorǵaý agenttiginiń dırektory Mansurbek Olloerov málimdedi.

Taldaý kórsetkendeı, olardyń 1475-i áleýmettik qaýiptiligi az qylmystardyń qurbany bolsa, 956-sy onsha aýyr emes, 284-i aýyr qylmys, 157-si asa aýyr qylmystardyń qurbany bolǵan.

— Ókinishke qaraı, balalarǵa qatysty zorlyq-zombylyq jaǵdaılary kóbeıip barady. Jábirlenýshilerdi jıi kinálaıdy nemese úndemeı qalýǵa májbúrleıdi. Dál osy únsizdik mádenıetine qarsy zorlyqpen kúreskendeı batyl kúresýimiz kerek, — dedi M. Olloerov.

Onyń aıtýynsha, agenttiktiń senim telefonyna túsken qońyraýlar ótken jylmen salystyrǵanda úsh esege artqan.

M. Olloerovtyń aıtýynsha, ınternet arqyly jasalǵan qylmystar úshin jaýapkershilik kúsheıtilip, balalardy qorǵaý boıynsha óz mindetterin oryndamaǵany úshin pedagogter men tárbıeshiler jaýapkershilikke tartylýy múmkin.

Eske sala keteıik, Ózbekstan prezıdenti 523 adamǵa raqymshylyq jasady.